بحب مصر

بحب مصر


طول عمرى عايشه فى مصر وطبعا زى كل مصرى كنت حاسه انها اسوأ مكان زحام فساد شوارع مش نظيفه وكل حاجه انتو عارفينها
ومرت الايام ولما سافرت وسبت مصر عرفت يعنى ايه مصر
عرفت ان هواها مش موجود فى اى مكان حتى وهو ملوث فما بالكم لما كان نقى
عرفت ان اهلها مفيش زيهم فى العالم مهما كانو
عرفت ان ميتها اجمل ميه حتى لو كانت ملوثه
انا مش بقول شعارات ولا انا بتاعه اغانى وطنيه انا بتكلم من تجربه عشتها واللى يسافر وميحسش بكه يبقى اكيد مش مصرى
طب نعمل ايه؟
نحب بعض وكفايه انانيه علشان كلنا هنستفيد لما مصر تبقى احسن بلد وهى تستحق كده مننا
المصريين منهم عظماء مش موجودين فى اى بلد عربى اخر
ولا احنا معتمدين على بترول لو خلص ميبقاش لنا قيمه
واحنا مسرحين رقاصيين فى العالم وبنلم النقطه زى بعض البلاد العربيه اللى كلنا عارفينها
يبقى نحس بقيمتنا ونثق بنفسنا ونعرف ان المصريين ان شاء الله راجعين تانى وهيكونوا على رأس الامم وهيقودوا بأذن الله البلاد العربيه والاسلاميه
بس شويه مجهود مننا كلنا وصبر علشان نحصد الخير لنا كلنا ويبقى قلبنا على قلب بعض ونبطل هبل
انا مشفتش غير المصريين هما اللى لما بيطلعو بره بيذكروا مساوىء بلدهم مع ان المساوئ دى فى كتير من الدول العربيه والاسلاميه وعمرنا ما شفنا حد منهم بيعمل كده
طبعا شئ طبيعى انهم يستهينو بالمصريين فى كل مكان خاصه فى دول الخليج اذا كان احنا اللى بنقول كده على نفسنا
هو يعنى مفيش حاجه حلوه فى مصر ولا فى المصريين
يعنى حتى اعملوا لنا قيمه!
صدقونى احنا ممكن نتغير ونغير من حال مصر ان شاء الله بس نثق فى نفسنا ونبص فى نص الكوب المملؤ
انا عايزه كل اللى يقرأ الموضوع ده بس يكتب ويقول لى مصر بالنسبه له ايه؟
انا مش بتحرر من انتمائى للاسلام انا انتمائى الاول للاسلام طبعا بس بحب مصر
وده كلام مش من عندى ده كلام رسولنا عليه الصلاه والسلام
القاكم على خير بأذن الله وأكون عرفت ايه رأيكم فى الكلام ده